Sardinía er önnur stærsta eyjan í Miðjarðarhafi, næst á eftir Sikiley. Sardinía tilheyrir Ítalíu og hefur gert síðan landið var sameinað 1861. Í eina tíð var eyjan hluti af konungsríkinu Sardinía sem náði einnig til Norðvestur-Ítalíu, eða frá 1297 til 1861.
Sardinía hefur verið mörgum hulin en hún liggur aðeins 12 km. suður af frönsku eyjunni Korsíku og sést vel á milli eyjanna. Sundið milli eyjanna heitir Bonifaciosundið. Sardinía er um 200 km. vestur af meginlandi Ítalíu. Sardinía er um 24.000 ferkílómetrar að stærð eða tæplega einn fjórði af stærð Íslands. Eyjan er vogskorin og er strandlengjan um 760 km. Íbúafjöldi er nálægt 1,6 milljón en höfuðstaður eyjarinnar er borgin Caligari á suðurströndinni.
Vegna þess hversu einangruð Sardinía er, hafa margar hefðir og venjur varðveist sem annars hefðu trúlega tapast. Miklar breytingar hafa átt sér stað á eyjunni undanfarna áratugi og ferðaiðnaður byggst upp sem hefur leyst landbúnað og fiskveiðar af hólmi. Frá gamalli tíð hefur verið mikil námuvinnsla á Sardiníu og er enn.
Sardinía er falleg eyja og vaxandi fjöldi ferðamanna leggur leið sína þangað. Á eyjunni eru fjórar sýslur: Cagliari, Nuoro, Oristano og Sassari. Malaríu gætti mjög fram á 20.öld. Flestir íbúanna búa á frjósamri strandlengjunni. Sumur eru þurrt og hlý en vetur úrkomusamir.
